खजुरा र झिमरुक गाउँपालिकाबीच अनुभव आदानप्रदान

खजुरा, बाँके

१० वैशाख, २०८३

​बाँकेको खजुरा गाउँपालिका र प्युठानको झिमरुक गाउँपालिकाका जनप्रतिनिधिहरूबीच आज एक विशेष अनुभव आदानप्रदान कार्यक्रम सम्पन्न भएको छ।

स्थानीय तहले गरिरहेका विकास निर्माण, न्यायिक कार्य सम्पादन र सुशासनका क्षेत्रमा भएका सफल अभ्यासहरू साटासाट गर्ने उद्देश्यले सो कार्यक्रम आयोजना गरिएको हो।

​प्युठानको झिमरुक गाउँपालिका (भ्यागुते) बाट गाउँपालिका उपाध्यक्ष  प्रमोद पोखरेलको नेतृत्वमा आएको भ्रमण टोलीलाई खजुरा गाउँपालिकाकी उपाध्यक्ष मन्जु मल्ल प्रमुख प्रशासकीय अधिकृत दिल बहादुर पाैडेललगायतका जनप्रतिनिधि र कर्मचारीहरूले स्वागत गर्नुभएको थियो।

​अनुभव र सिकाईको साझा मञ्च

​कार्यक्रममा दुवै पालिकाका तर्फबाट आ-आफ्ना क्षेत्रमा गरिएका उदाहरणीय कार्यहरूको बारेमा जानकारी गराइएको थियो। खजुरा गाउँपालिकाकी उपाध्यक्ष मन्जु मल्लले खजुराले शिक्षा, स्वास्थ्य र न्यायिक समितिको कार्यसम्पादनमा अपनाएका प्रक्रियाहरूको बारेमा चर्चा गर्नुभयो। उहाँले अन्तर-पालिका भ्रमण र अनुभव आदानप्रदानले स्थानीय सरकारलाई अझ परिपक्व बनाउन मद्दत पुग्ने विश्वास व्यक्त गर्नुभयो।

​यस्तै, झिमरुक गाउँपालिकाका तर्फबाट उपाध्यक्ष  प्रमोद पोखरेलले झिमरुकमा भइरहेका कृषि र पूर्वाधार विकासका प्रयासहरूका बारेमा जानकारी दिँदै खजुराको विकास मोडेलबाट आफूहरूले धेरै कुरा सिक्न सकेको बताउनुभयो।

​सहकार्यको प्रतिवद्धता

​कार्यक्रममा उपस्थित जनप्रतिनिधि र कर्मचारीहरूले स्थानीय सरकारका साझा चुनौतीहरू—स्रोतको व्यवस्थापन, जनशक्ति परिचालन र कानुन निर्माणका विषयमा छलफल गरेका थिए। भौगोलिक रूपमा फरक भए पनि स्थानीय तहका समस्या र सम्भावनाहरू धेरै हदसम्म मिल्दोजुल्दो हुने भएकाले आगामी दिनमा पनि यस्तो सहकार्यलाई निरन्तरता दिने प्रतिवद्धता जनाइएको छ।

​कार्यक्रममा खजुरा गाउँपालिकाका विभिन्न वडाका वडा अध्यक्षहरू, कार्यपालिका सदस्यहरू र कर्मचारीहरूको उल्लेख्य उपस्थिति रहेको थियो। प्युठानबाट आएको टोलीले खजुरा क्षेत्रका केही गौरवका आयोजनाहरूको समेत स्थलगत अवलोकन गरेको थियो।

​यस किसिमको अन्तर-जिल्ला समन्वयले संघीयताको मर्म अनुसार स्थानीय सरकारहरूबीच भाइचारा र सिकाईको वातावरणलाई थप मजबुत बनाएको विश्लेषण गरिएको छ।